receu et festoye tout au despens du roy. Apres disner le dict marquis de Mantoua retourna vers le roy, et le remer cya grandement du grant honneur quil luy avoit fait faire. Et luy donna le roy ung moult beau coursier que il avoit achete du bastard de Liege cinq cens escus. Et apres ces choses faictes il parla au roy grant piece en prenant conge de luy, et sen alla au camp des Venitiens. Puis incontinent quil fut party Messeigneurs de Bresse et de Foix allerent au devant du duc de Ferrare qui venoit vers le roy, le quel fut moult amyablement receu du roy et de tous les seigneurs. Et apres le recueil fait et aucuns devis le roy le fist mener au logis ou le marquis de Mantoua avoit este festoye. Et aussi fut cestuy duc de Ferrare par le commandement du roy festoye et tres honorablement et son fils et tous ses gens.

Mardy vr jour du moys doctobre fut fait a Verse le service de monseigneur de Vandosme en la grant eglisc de Verse nommee Saincte Eusebie, au quel service fut fait le plus grant dueil de prince que jamais fut veu. Car certes il le valoit, cestoit lescarboucle des princes de son estat en beaulte et bonte, en humanite, saigesse, doulceur, benignite, et est a scavoir que le roy en fut si marry que nul ne le pouvoit reconforter. Et du grant amour que le roy avoit en luy fist faire lobseque comme se il eust este son propre frere. Car toutes choses furent observees et gardees tant en cerimonies, honneurs et reverences que en toutes autres choses que il appartient a ung grant seigneur du sang royal tel comme il estoit, et prochain parent du roy, dont pour ce faire fut mys le corps a lentrce de son logis, le quel corps avoit este embasme,

ouvert et mys en tel et semblable estat comme il est requis en loffice royalle moult bien clos et enferme dedans en ung beau sercueil de plomb couvert de boys, a raison de quoy il le failloit porter en France. Sur le quel sercueil y avoit une grant courverture de veloux noir a tout une grant croix de satin blanc ou pendoient les armes du dict seigneur de coste et dautre. Or pour obvier au desordre, aussi pour faire place et lieu a ceulx qui devoient approcher le corps de degre en degre, vint premier le prevost de lhostel du roy avec ses archiers et sergens tous habilles de dueil qui avoient assez a faire de faire reculer le peuple tant des Francois que dautres qui venoient plaindre et plorer sa mort. Les gens deglise vindrent qui de toutes pars avoient este mandes et requis de par le roy pour venir a leglise faire le service, cest a scavoir les quatre mendians qui estoient en moult grant nombre, et avec eulx vindrent toutes gens de religion, de Sainct Benoist, de Citeaulx, prieurs, abbes, moynes blancs et noirs autant que il y en avoit au pays a tout leurs croix et eaue benoiste, la plus par diceulx plorans et regrettans ceste mort trop piteuse. Les enfans fils et filles vindrent en bel ordre, les croix de toutes les paroises de Verse ⚫ et des environs, apres les quelles estoient plusieurs petis enfans de cueur tous revestus de surplis, les chappellains, prestres, vicaires, et cures dicelles en grant nombre. Apres les chanoines, doyens, archediacres, gens constitues en dignite deglise devotement et piteusement chantans et plusieurs diceulx plorans et regrettants la mort du vertueux prince, car tel ne le congnoissoit ne ne lavoit jamais veu qui ploroit voyant plorer les autres.

Puis apres marcherent les cardinaulx, evesques, archevesques et abbes cest a scavoir monseigneur le ca: dinal Petri Advincula, le cardinal de Gennes, le cardinal de Sainct Malo, monseigneur dAmboise qui fist loffice celluy jour, monseigneur levesque dAmbrun, monseigneur levesque dAngiers confesseur du roy, levesque de Cornouaille, levesque de Syon et plusieurs autres grans seigneurs constitues en dignite. Devant et apres le corps y avoit grant et merveilleuse habondance de torches, cierges et luminaires tous armoyes des armes du dict seigneur portes par gens vestus de dueil tout a neuf. Apres vint le corps devant le quel et apres estoient deux huyssiers a masse habilles en dueil, et y avoit grant nombre de gentils hommes, officiers, maistres dhostel, varlets de chambre, escuyers, eschansons, paiges servans et autres du train de sa maison qui en crys piteux, lamen tables pleurs, soupirs et ameres exclamations, habilles en dueil se comportoient si douloureusement pour la mort de leur feu bon maistre que il nest possible de le dire ne racompter. Car le noble seigneur lors quil estoit au lict de la mort quant il les veoit plorer pour luy il les reconfortoit tant doulcement et tant humainement que il nestoit cueur qui ne fondist en pleurs et en larmes et leur disoit mes amys, mes enfans ne plorez point pour moy, car cest le plaisir de Dieu que je meure, et puis quil luy plait je prens la mort en patience, et le remercye du bien quil me fait de le recongnoistre, et de luy demander secours a la fin de mes jours, et pourtans mes amys ne plorez point, mais priez Dieu que aye recongnoissance de luy jusques a ma mort, ct apres je me recommande a

vos bonnes prieres, et ung petit devant que il mourust il escrivist une lettre au roy, esquelle pour principale substance disoit quil estoit venu par son commandement et mandement oultre les mons pour le servir loyallement, ce quil avoit bonne intention de faire se Dieu luy eut donne grace de vivre plus avant, mais puis quil le vouloit appeller i estoit bien content que sa voulente fut acomplye en luy. Et le plus grant regret quil avoit cestoit quil mouroit hors de son pays et loing de sa bonne femme et de ses petis enfans, et ne regrettoit autre chose. Et croy que cela luy abrega fort ses jours. Et de fait la derniere clause de ses lettres estoit telle, mon tres chier seigneur je vous dis adieu en vous recommandant trois choses apres ma mort, premierement ma povre ame, ma tres bonne amye et loyalle femme et mes petis enfans, les quels demourent vefve et orphelins. Si vous prie et supplye tres humblement en faveur damour et de equite que il vous plaise estre leur mary et pere, ou du moins estre leur vray seigneur, garde et protecteur tant de leurs corps que de leurs biens, en la quelle garde et protection dicy en avant je vous les remets tout entierement pour la bonne fiance que jay en vous. Et quand le roy veit les dictes lettres, a peu que le cueur ne luy fendit de pitie et de compassion, car il veoit bien que il perdoit ung des bons et vrays amys que il eust au monde, et ung des loyaulx, des beaulx et bons princes de son royaulme, parquoy apres la mort dicelluy il monstra quil laymoit bien, le quel seigneur fist la plus belle solemnite que il est possible de faire. Comme dit a este ses gentils hommes et autres de son hostels tous habilles

en dueil alloient devant le corps, entre les quels lung des gentils hommes plus suffisant portoit son heaulme tymbre comme on a acoustume de faire a ceulx du sang royal, lautre portoit son escu et ses armes, ung autre sa colte darmes, son espee et autres portoient son estandart son guydon, son enseigne et toutes autres choses a ce appartenantes, et puis ses trompettes et clairons, huyssiers, officiers, chevaucheurs tous habilles en dueil piteux portans les dictes armes. Apres les quels on portoit le corps couvert comme dict est, le quel portoient douze grans gentils hommes, et aux quatre coings du dict corps tenoient les quatre bouts dung poille de drap dor qui estoit par dessus, monseigneur de Bresse, monseigneur de Foix, monseigneur de Ligny et monseigneur de Guyse. Et quant le dict corps fut passe, marcherent apres ceulx qui faisoient le dueil, premierement monseigneur Loys'de Vandosme son frere, et le menoit monseigneur Loys duc dOrleans, apres monseigneur de Nevers Anguilbert de Cleves, monseigneur le Prince, monseigneur de Bresse le jeune, monseigneur le grant bastard de Bourbon, monseigneur de la Gratuze, monseigneur le mareschal de Gye, monseigneur de Dunois, monseigneur de la Trimoille, monseigneur de Piennes, monseigneur le Vidasme, monseigneur Jehan Jacques et monseigneur Camille Ytaliens, avec plusieurs autres grans seigneurs de France de la maison du roy, et de larmee tous en bel ordre et dueil sumptueux. Apres les quels marcherent tous en dueil et bel ordre les cent gentils hommes, les cent pensionnaires, et puis infiny nombre de peuple, tant gens darmes et gentils hommes francois, alemans, italiens et autres