CHAPITRE XX. Protestation authentique pour graver en l'ame la resolution de servir Dieu, et conclure les actes de penitence. Je soussignée, constituée, et establie en la presence de Dieu eternel, et de la cour celeste, ayant consideré l'immense misericorde de sa divine bonté envers moy, tres-indigne et chetive creature, qu'elle a créée de rien, conservée, soutenuë, délivrée de tant de dangers, et comblée de tant de bien-faicts; mais sur tout ayant consideré cette incomprehensible douceur et clemence, avec laquelle ce tres-bon Dieu m'a si benignement tolerée en mes iniquitez, si souvent et si amiablement inspirée, me conviant à m'amender, et si patiemment attenduë à penitence et repentance jusqu'à cette année de mon aage, nonobstant toutes mes ingratitudes, desloyautez et infidelitez, par lesquelles differant ma conversion, et mesprisant ses graces, je l'ay si imprudemment offencée : apres avoir encore consideré qu'au jour de mon sacré baptesme, je fus si heureusement et si sainctement voüée et dediée à mon Dieu pour estre sa fille, et que contre la profession qui fut alors faicte en mon nom, j'ai tant et tant de fois si mal-heureusement et detestablement profané et violé mon esprit, l'appliquant et l'employant contre la divine majesté; enfin revenant maintenant à moy-mesme, prosternée de cœur et d'esprit devant le throsne 1 de la justice divine, je me recognois, advoüe et confesse pour legitimement atteinte et convaincüe du crime de leze majesté divine et coulpable de la mort et passion de Jesus-Christ, à raison des pechez que j'ay commis, pour lesquels il est mort, et a souffert le tourment de la croix, si que je suis digne par consequent, d'estre à jamais perduë et damnée. Mais me retournant devers le throsne de l'infinie misericorde de ce mesme Dieu eternel, apres avoir detesté de tout mon cœur, et de toutes mes forces, les iniquitez de ma vie passée, je demande et requiers humblement grace et pardon et mercy, avec entiere absolution de mon crime, en vertu de la mort et passion de ce mesme Seigneur et Redempteur de mon ame, sur laquelle m'appuyant comme sur l'unique fondement de mon esperance, j'advouë derechef, et renouvelle la sacrée profession de la fidelité faicte de ma part à mon Dieu en mon baptesme, renonçant au diable, au monde, et à la chair; detestant leurs malheureuses suggestions, vanitez et concupiscences, pour tout le temps de ma vie presente, et de toute l'eternité; et me convertissant à mon Dieu debonnaire et pitoyable 1, je desire, propose, delibere, et me resous irrevocablement de le servir et aimer maintenant et eternellement, luy donnant à ces fins, dediant et consacrant mon esprit avec toutes ses 1 Plein de pitié. facultez, mon ame avec toutes ses puissances, mon cœur avec toutes ses affections; mon corps avec tous ses sens; protestant de ne jamais plus abuser d'aucune partie de mon estre contre sa divine volonté, et souveraine majesté, à laquelle je me sacrifie et immole en esprit, pour luy estre à jamais loyale, obeyssante et fidèle creature, sans que je veuille oncques m'en desdire ny repentir. Mais helas! si par suggestion de l'ennemy ou par quelque infirmité humaine, il m'arrivoit de contrevenir en chose quelconque à cette mienne resolution et consecration, je proteste dès maintenant et me propose moyennant la grace du SainctEsprit de m'en relever si tost que je m'en apercevray, me convertissant derechef à la misericorde divine sans retardation, ny dilation quelconque. Cecy est ma volonté, mon intention, et ma resolution inviolable et irrevocable, laquelle j'advouë et confirme sans reserve, ny exception, en la mesme presence sacrée de mon Dieu, et à la veuë de l'Eglise triomphante, et en la face de l'Eglise militante ma mere, qui entend cette mienne declaration, en la personne de celuy qui comme officier d'ycelle m'escoute en cette action. Plaise à vous, ô mon Dieu eternel, tout puissant et tout bon, Pere, Fils et Sainct-Esprit, confirmer en moy cette resolution, et accepter ce mien sacrifice cordial et interieur, en odeur de suavité. Et comme il vous a plû me donner l'inspiration et volonté de le faire, donnez-moy aussi la force et la grace requise pour le parfaire. O mon Dieu, vous estes mon Dieu, Dieu de mon cœur, Dieu de mon âme, Dieu de mon esprit, ainsi je vous recognois et adore maintenant, et pour toute l'eternité. Vive Jésus. CHAPITRE XXI. Conclusion pour cette premiere purgation. Cette protestation faicte, soyez attentive, et ouvrez les oreilles de vostre cœur, pour ouyr en esprit la parole de vostre absolution que le Sauveur mesme de vostre ame assis sur le throsne de sa misericorde prononcera là haut au ciel devant tous les anges et les saincts à mesme temps qu'en son nom le prestre vous absout icy bas en terre. Si que toute cette trouppe des bien-heureux se rejoüissant de vostre bon-heur, chantera le cantique spirituel d'une allegresse non pareille, et tous donneront le baiser de paix et de societé à vostre cœur, remis en grace et sanctifié. O Dieu, Philotée, que voilà un contract admirable, par lequel vous faictes un heureux traicté avec sa divine majesté, puis qu'en vous donnant vous-mesme à elle, vous la gaignez, et vous-mesme aussi pour la vie eternelle. Il ne reste plus sinon que prenant la plume en main, vous signiez de bon cœur l'acte de vostre protestation, et que par apres vous alliez à l'autel, où Dieu reciproquement signera et scellera vostre absolution, et la promesse qu'il vous fera de son paradis : se mettant luymesme par son sacrement, comme un cachet et sceau sacré, sur vostre cœur renouvellé. En cette sorte, ce me semble, Philotée, vostre ame sera purgée du peché, et de toutes les affections du peché. Mais d'autant que ces affections renaissent aisement en l'ame, à raison de nostre infirmité et concupiscence, qui peut estre mortifiée, mais qui ne peut mourir pendant que nous vivons icy bas en terre; je vous donneray des advis, lesquels estant bien practiquez vous preserveront desormais du peché mortel, et de toutes les affections d'iceluy, afin que jamais il ne puisse avoir place en vostre cœur, et d'autant que les mesmes advis servent encore pour une purification plus parfaicte, avant que de le vous donner, je vous veux dire quelque chose de cette plus absoluë pureté à laquelle je desire vous conduire. CHAPITRE XXII. Qu'il se faut purger des affections que l'on a aux pechez veniels. A mesure que le jour se fait, nous voyons plus clairement dedans le miroir les tasches et soüillures de nostre visage: ainsi à mesure que la lumiere interieure du Sainct-Esprit esclaire nos consciences, nous voyons plus distinctement et |