SECONDE PARTIE DE L'INTRODVCTION, CONTENANT DIVERS ADVIS POVR L'ELEVATION DE L'AME A DIEV PAR L'ORAISON ET LES SACREMENS. CHAPITRE PREMIER. DE LA NECESSITÉ DE L'ORAISON. 'oraison mettant nostre entendement en la clarté et lumiere diuine, et exposant nostre volonté à la chaleur de l'amour celeste, il n'y a rien qui purge tant nostre entendement de ses ignorances, et nostre volonté de ses affections deprauées. C'est l'eauë de benediction, qui par son arrousement fait reuerdir et fleurir les plantes de nos bons desirs, laue nos ames de leurs imperfections, et desaltere nos cœurs de leurs passions. Mais sur tout, ie vous conseille la mentale, cordiale, et particulierement celle qui se fait autour de la vie et passion de nostre Seigneur : en le regardant souuent par la meditation, toute vostre ame se remplira de luy, vous apprendrez ses contenances, et formerez vos actions au modelle des siennes. Il est la lumiere du monde : c'est doncques en luy, par luy, et pour luy, que nous deuons estre esclairez et illuminez; c'est l'arbre de desir, à l'ombre duquel nous nous deuons rafraischir, c'est la viue fontaine de Iacob, pour le lauement de toutes nos soüilleures. Enfin les enfans, à force d'oüyr leurs meres, et de begayer auec elles, apprennent à parler leur langage. Et nous demeurans prés du Sauueur par la meditation, et observans ses paroles, ses actions et ses affections, nous apprendrons moyennant sa grace, à parler, faire et vouloir comme luy. Il faut s'arrester là, Philotée et croyez-moy, nous ne sçaurions aller à Dieu le Pere que par cette porte: car tout ainsi que la glace d'un miroüer ne sçauroit arrester nostre veuë, si elle n'estoit enduite d'estain ou de plomb par derriere aussi la Diuinité ne pourroit estre bien contemplée par nous en ce bas monde, si elle ne se fût jointe à la sacrée humanité du Sauueur, duquel la vie et la mort sont l'obiet le plus proportionné, soüef, delicieux et profitable, que nous puissions choisir pour nostre meditation ordinaire. Le Sauueur ne s'appelle pas pour neant, le pain descendu du Ciel : car comme le pain doit estre mangé auec toutes sortes de viandes, aussi le Sauueur doit estre medité, consideré et recherché en toutes nos oraisons et actions. Sa vie et mort a esté disposée et distribuée en diuers poincts, pour seruir à la meditation par plusieurs autheurs ceux que ie vous conseille, sont S. Bonauenture, Bellintani, Bruno, Capilla, Grenade, du Pont. Employez-y chaque iour vne heure deuant disner, s'il se peut, au commencement de vostre matinée, parce que vous aurez vostre esprit moins embarassé et plus frais aprés le repos de la nuict. N'y mettez pas aussi dauantage d'vne heure, si vostre Pere spirituel ne le vous dit expresse ment. |