de ses seruiteurs : ce que saincte Catherine de Sienne louë infiniment en ses dialogues. La deuote Princesse saincte Elizabeth se soubmit auec vne extreme obeyssance au Docteur M. Conrad. Et voicy l'vn des aduis que le grand S. Louys fit à son fils auant que mourir Confesse-toy souuent, eslis vn Confesseur idoine, qui soit prud'homme, et qui te puisse seurement enseigner à faire les choses qui te seront necessaires. L'amy fidel, dit l'Escriture saincte, est vne forte protection: celuy qui l'a trouué, a trouué vn thresor. L'amy fidel est vn medicament de vie, et d'immortalité : ceux qui craignent Dieu le trouuent. Ces diuines paroles regardent principalement l'immortalité, comme vous voyez, pour laquelle il faut sur toutes choses auoir cet amy fidel, qui guide nos actions par ses aduis et con seils, et par ce moyen nous garentir des embusches et tromperies du malin : il nous sera comme vn thresor de sapience en nos afflictions, tristesses et cheutes: il nous seruira de medicament pour alleger et consoler nos cœurs és maladies spirituelles il nous gardera du mal, et rendra nostre bien meilleur, et quand il nous arriuera quelque infirmité, il empeschera qu'elle ne soit pas à la mort, car il nous en releuera. Mais qui trouuera cet amy? le Sage respond, ceux qui craignent Dieu, c'est à dire, les humbles qui desirent fort leur auancement spirituel. Puis qu'il vous importe tant, Philotée, d'aller auec vne bonne guide en ce sainct voyage de deuotion, priez Dieu auec vne grande instance, qu'il vous en fournisse d'vne qui soit selon son cœur : et ne doutez point, car quand il deuroit enuoyer vn Ange du ciel, comme il fit au jeune Tobie, il vous en donnera vne bonne et fidelle. : Or ce doit tousiours estre vn Ange pour vous, c'est à dire, quand vous l'aurez trouuée, ne la considerez pas comme vn simple homme, et ne vous confiez point en icelle, ny en sont sçauoir humain, mais en Dieu, qui vous fauorisera, et parlera par l'entremise de cet homme, mettant dans le cœur et dans la bouche d'iceluy ce qui sera requis pour vostre bon-heur si que vous le deuez escouter comme vn Ange qui descend du Ciel pour Vous y mener. Traitez auec luy à cœur ouuert en toute sincerité et fidelité, luy manifestant clairement vostre bien et vostre mal, sans feintise ny dissimulation : et par ce moyen vostre bien sera examiné et plus asseuré, et vostre mal sera corrigé et remedié. Vous en serez allegée et fortifiée en vos afflictions, moderée et reglée en vos consolations. Ayez en luy vne extreme confiance meslée d'vne sacrée reuerence, en sorte que la reuerence ne diminuë point la confiance, et que la confiance n'empesche point la reuerence. Confiez-vous en luy auec le respect d'vne fille enuers son pere, respectez-le auec la confiance d'vn fils enuers sa mere: Bref, cette amitié doit estre forte et douce, toute saincte, toute sacrée, toute diuine, et toute spirituelle. Et pour cela, choisissez-en vn entre mille, dit Auila; et moy ie dis entre dix mille, car il s'en trouue moins que l'on ne sçauroit dire qui soient capables de cet office : il le faut plein de charité, de science et de prudence : si l'vne de ces trois parties luy manque, il y a du danger; mais ie vous dis derechef, demandez-le à Dieu, et l'ayant obtenu, benissez sa diuine Maiesté, demeurez |