CHAPITRE VI. LA PREMIERE PVRGATION, QVI EST CELLE A première purgation qu'il faut faire, c'est celle du peché; le moyen de la faire, c'est le S. Sacrement de penitence cherchez le plus digne Confesseur que vous pourrez, prenez en main quelqu'vn des petits Liures qui ont esté faits pour ayder les consciences à se bien confesser, comme Grenade, Bruno, Arias, Auger lisez-les bien, et remarquez de poinct en poinct en quoy vous auez offencé, à prendre depuis que vous eustes I'vsage de raison iusques à l'heure presente. Et si vous vous defiez de vostre memoire, mettez en escrit ce que vous aurez remarqué : et ayant ainsi preparé et ramassé les humeurs peccantes de vostre conscience, detestez-les, et les rejettez par vne contrition et desplaisir aussi grand que vostre cœur pourra souffrir, considerant ces quatre choses que par le peché vous auez perdu la grace de Dieu, quitté vostre part de Paradis, accepté les peines eternelles de l'enfer, et renoncé à l'amour eternel de Dieu. Vous voyez bien, Philotée, que ie parle d'vne confession generale de toute la vie, laquelle certes, ie confesse bien n'estre pas tousiours absolument necessaire, mais ie considere bien aussi qu'elle vous sera extremement vtile en ce com mencement; c'est pourquoy ie vous la conseille grandement. Il arriue souuent que les confessions ordinaires de ceux qui viuent d'vne vie commune et vulgaire sont pleines de grands deffauts. Car souuent on ne se prepare point ou fort peu, on n'a point la contrition requise, ains il aduient maintesfois que l'on se va confesser auec vne volonté tacite de retourner au peché, d'autant qu'on ne veut pas euiter 'occasion du peché, ny prendre les expediens necessaires à l'amendement de la vie et en tous ces cas icy la confession generale est requise pour asseurer l'ame. Mais outre cela, la confession generale nous appelle à la connoissance de nous-mesmes, nous prouoque à vne salutaire confusion pour nostre vie passée, nous fait admirer la misericorde de Dieu, qui nous a attendu en patience; elle appaise nos cœurs, delasse nos esprits, excite en nous des bons propos, donne sujet à nostre Pere spirituel de nous faire des aduis plus conuenables à nostre condition, et nous ouure le cœur, pour auec confiance nous bien declarer aux confessions sui uantes. Parlant doncques d'vn renouuellement general de nostre cœur, et d'vne conuersion vniuerselle de nostre ame à Dieu, par l'entreprise de la vie deuote, i'ay bien raison, ce me semble, Philotée, de vous conseiller cette confession generale. CHAPITRE VII. DE LA SECONDE PVRIFICATION, QVI EST CELLE DES AFFECTIONS DV PECHÉ. ovs les Israëlites sortirent en effet de la terre d'Egypte, mais ils n'en sortirent pas tous d'affection: c'est pour quoy emmy le desert plusieurs d'entr'eux regretoient de n'auoir pas les oignons et les chairs d'Egypte. Ainsi il y a des penitens, qui sortent en effet du peché, et n'en quittent pourtant pas l'affection; c'est-à-dire, ils proposent de ne plus pecher, mais c'est auec vn certain contre-cœur qu'ils ont de se priuer et abstenir des malheureuses delectations du peché; leur cœur renonce |