paignols allerent au prince de Tharente, les Alemans se vindrent rendre au roy tous par sauf conduit. Et ce jour entra au chasteau par le commandement du roy monseigneur de Cresol, messire Gabriel de Monfaulcon avec ses archiers, une quantité des gens de messire Gabriel de Montfaulcon et des siens une aultre quantite les quels eurent la charge du chasteau et des biens estans au dict chasteau en grant nombre qui estoit une belle chose a veoir les biens qui estoient dedans le dict chasteau de toutes sortes et de plusieurs facons.

Samedy vir jour de mars le roy ouyt messe a Sainct Dominique et disna en son logis, et apres disner alla veoir le Chasteau Nove apres ce que les Alemans et autres nations furent dehors, et entra dedans le chasteau a telle compaignie quil luy pleut. Quant le roy eut veu le dict chasteau a son aise partit et vint veoir son siege devant le chasteau de Love, et sur le tart le prince de Tharente vint parler au roy joingnant lartillerie, dont monseigneur de Ligny et monseigneur de Guyse estoient en ostaige jusques a son retour, ce parlement fut brief, car il estoit tart le prince print conge du roy en sa gallee et incontinent monseigneur de Ligny et monseigneur de Guyse revindrent devers le roy. Ce jour le prince de Salerne arriva a Naples le quel avoit este fugitif cinq ans pour la crainte du roy Alphonce de Naples et ce jour trouva ung sien petit fils que le dict Alphonce avoit tenu prisonnier, mais le cardinal Petrus Advincula lavoit rachete et baille grosse rancon pour luy.

Dimanche vi jour de mars le roy ouyt messe aux Chartreux et aux Augustins et alla disner chez monsei

on

gneur de Clerieux et apres disner le roy alla en son siege et la fut faicte la reponse que le roy ne feroit pas ce que les autres demandoient, et fut envoye le Prevost de Paris et lescuyer Galiot qui les sommerent deulx rendre, ou au trement on leurs monstreroit de beaulx points, ce que fist, car en moins de trois heures on tira plus de ccc. coups dartillerie contre le dict chasteau, et sur le tart le roy sen retourna en son logis en la ville acompaigne de plusieurs grans seigneurs.

Lundy Ix jour de mars le roy ouyt messe a lAnunciade et disna en son logis, et apres disner alla au siege et veit la batterie qui se fist ce jour, le soir revint a son logis en la ville, la batterie fut grant ce jour qui estonna fort ceulx du chasteau.

Mardy x jour du dict moys le roy ouyt messe aux Chartreux puis alla disner aux tranchees de son artillerie devant le dict chasteau de Love, et disna soubs ung pavillon. Et fut tant battu le chasteau que on abatit en la mer une des grosses tours qui y fut tellement que on veoit dedans le dict chateau tout par tout, et telle tormente fut du ton de lartillerie que les gros poissons venoient tous mors sur la mer par limpetuosite et habondance des grosses pierres qui cheo:ent dedans.

Mercredy x1 jour de mars le roy ouyt messe aux Chartreux, et alla disner aux tranchees du siege, et fut tellement battue que ceulx de dedans ne scavoit ou eulx saulver, et veit le roy ses gens aller par dessus la chaussee jusques en leur boulevart, et se combattirent ensemble tellement que ceulx de dedans envoyerent querir des arbalestriers, mais ainsi que iceulx arbalestriers venoient

a la dicte batterie au boulevart ung canonnier du roy les veit venir, mais dung coup de faulcon tua le principal des arbalestriers, pour le quel coup le roy luy donna dix escus dor. Alors ceulx du chasteau se saulvoient le mieux quils pouvoient, et en ce faisant ung des gens du roy naigea au travers de la mer depuis le siege jusques au chasteau pour veoir leur contremine, mais ceulx de dedans lappercurent et a force de pierres le chasserent. car lartillerie ne le pouvoit grever et revint au siege, le roy voyant le devoir quil avoit fait luy donna vingt escus. Ce jour une des bombardes du roy rompit et tua ung Italien de lost du roy, dont ce fut domaige, et blessa aucuns Francois, puis retourna le roy en son logis.

Jeudy xi jour de mars le roy ouyt messe aux Chartreux et disna en son logis, et fut ce jour le chasteau de Love tant battu dartillerie quil convint au cappitaine estant au dict chasteau sortir pour venir parler au roy en son siege a genoulx la teste nue, le quel avoit les cheveulx tous blancs, bel homme et a mains joinctes requist avoir treves jusques au lendemain, ce que le roy luy octroya, parquoy furent avec le cappitaine du dict chasteau le prince de Salerne et le mareschal de Gye pour parlementer a ceulx du chasteau et allerent par mer avec le dict cappitaine.

Vendredy xe jour du dict moys le roy ouyt messe aux Chartreux, et disna le roy ce jour aux tranchees de son siege, et apres disner le prince de Salerne et le mareschal de Gye menerent le cappitaine Claude de la Chartre, son fils et des archiers de la garde au chasteau de par le roy jusques a ce que le roy y mist cappitaine.

Et ainsi fut le roy seigneur du chasteau. Puis le roy ordonna le cappitaine Claude de Rabandanges et monseigneur de Lavernade avec certain nombre de gens requis par eulx, puis sortit le dict cappitaine Claude et son fils et ses gens sans rien oster de la dicte place vitailles ne autres choses.

Samedy Xive jour de mars le roy ouyt messe au mont dOlivet, et disna au logis de monseigneur de Clerieux.

CHAPITRE XXIV.

Comment le roy receut les hommaiges et fidelites des princes et princesses du royaulme de Naples et autres pays et faisant les officiers.

IMANCHE xv de mars le roy ouyt messe a lAnunciade, et ne bougea du chasteau de Capouane sinon pour aller ouyr la messe jusques au dimanche xxn du dict mois en recevant les fidelites et hommaiges des

princes et princesses du royaulme de Naples ensemble des nobles seigneurs et nobles hommes, tant de la ville de Naples et terre de la Bourde, Calabre, de Pouille que dautres pays subjets au dict royaulme.

Lundy xxII de mars le roy ouyt messe a lAnunciade et apres disner alla jouer a Ponge Real, et devant luy la fille de la duchesse de Malsy comme cy devant est escript fit mille pennades, saulx et cources sur ung grant coursier de Poule, la quelle chose estoit merveilleuse a veoir faire une fille, et cuyde que au siege de Troye la grant

les dames qui vindrent au service des Troyens neussent sceu faire la centiesme partie des choses quelle faisoit.

Mardy XXIV de mars le roy ouyt messe au mont dolivet, et disna au chasteau de Capouane en recevant dautres gens a fidelite et hommaige, et estoit estably le lieu ou faisoit la chancellerie comme en France, et presidoit en estat monseigneur le president Gaisnay, monseigneur le chancellier et les secrettaires du roy soubs luy ayant seaulx grans et petits a queue simple et a double donnant grace et remission comme en France aubaynes et forfaictures, ordonner coing a monnoye dor, dargent et aultres metaulx en plusieurs sortes comme escus, ducats a double nom, double coing du roy nouveau fait par luy, les armes de France dung coste, celle de Sicile de lautre a croisette de Hierusalem. Oultre le roy mist et fist pour lors, de la monnoye nouveau maistre Marceau, aux domaines maistres nouveaulx en tous estas a son vouloir et plaisir. Aussi il fist dons a ses gens des offices des pays cy devant nommes, tant aux seigneurs, gentils hommes gens darmes que a ses officiers, et tout passe par la court de la chancellerie chez le roy ainsi comme en France.

Mercredy xxv de mars le roy ouyt messe a Sainct Pierre qui estoit le jour de la Nostre Dame joingnant son logis et alla disner a son dict logis, et ouyt vespres a Nostre Dame de Consolation, ce jour vindrent nouvelles que Gayette estoit prinse.

Jeudy xxvi de mars le roy ouyt messe a Sainct Jehan, ce jour monseigneur de Beaucaire se partit de Naples et alla prendre possession du dict Gayette.