chevaucherent ensemble parmy Romme et allerent a Sainct Paul hors Romme, le pape bien acoustre de douze hacquenees toutes blanches et rien dessus, apres luy sa garde dhommes darmes, archiers et arbalestriers et enfans a pied a la mode du pays, et laquets et gens deglise avec luy, comme cardinaulx, archevesques, legatz et autres. Le roy avoit ses ordonnances et garde, ses pensionnaires et ses gentils hommes quatre cens archiers de sa garde et quatre cens arbalestriers, sans les grans seigneurs de son sang et autres chambellans et chevaliers de lordre. Le pape monstra au roy plusieurs choses auctentiques comme le mont Omnis Terra qui est pres de la porte de Romme, et luy monstra aussi ou gist Romus en la muraille de la dicte cite, devers Sainct Paul. Lundy, le roy ouyt messe a Saint Marc, et apres le disner alla a Saint Jehan de Latran et a Saincte Marie la maior. Mardy XXVII jour de janvier, le roy alla ouyr messe au Trois Fontaines hors de Romme, ou sainct Paul fut decapite, et alla disner a Sainct Paul, puis alla veoir ou sainct Jehan Evangeliste fut boully en huylle et ou sainct Pierre fut pendu par les pieds. CHAPITRE XVIII. Comment le roy partit de Romme, et lui bailla le Pape le Turc. Et dung Juif qui fut baptise. E mercredy xxvIII jour de janvier, le roy ouyt messe a sainct Marc et alla disner a Sainct Pierre pour prendre conge du pape et ny alla pas tout seul, et la eut la benediction du pape qui luy bailla son fils le cardinal de Valence la grant pour lacompaigner jusque a Naples. Et le pape livra le Turc au roy le quel il emmena et le fils du pape, mais pour vous donner a congnoistre le roy nalla pas seul devers le pape, car il avoit avec luy les cent pensionnaires, ses cent gentils hommes, deux cens arbalestriers gascons, six mille Alemans en une bende et dix huyt cens lances qui le surattendoient par les rues de Romme. Jamais homme ne veit telle yssue de prince que fut ceste la dont le pape en eut grant merveille et tout le peuple de Romme sans les autres qui estoient desja a lavant garde avec lartillerie qui estoit devant. Et alla coucher le roy a Marigue au chemin de Naples. Ainsi se partit le roy, le fils du pape et le Turc de Romme et alla coucher au dict Marigue une ville qui est aux Coulonnois. Jeudy xxIx jour de janvier le roy ouyt messe a Marigue et disna, et apres disner alla coucher a Belistre, et toute cette journee ne cessa de pleuvoir et logea le roy chez levesque de Belistre et y fut jusques au mardy troisiesme jour de fevrier. Et avec le roy estoit le fils du pape le quel se deroba secretement par nuyct et sen retourna a Romme devers le pape dont le pape et luy se parjurerent du serment quils avoient faict au roy. Samedy xxx jour de janvier le roy ouyt messe a Belistre en leglise cathedrale. Ce jour fut prinse dassault une ville et ung chasteau nomme Mont Fortin qui estoit a ung nomme Jacques le Conte le quel avoit faict serment au roy et print de luy souldee, et toute fois fut ceste ville et chasteau contre le roy laquelle fut prinse par Angilbert monseigneur de Cleves seigneur de Nevers comme cappitaine des Suisses et des cappitaines des compaignies dordonnance, et ainsi acompaignes diceulx gens fut par luy la place prinse, la quelle fut fort battue dartilleric, et y furent prins deux des fils du dict Jacques le Conte et les tint prisonniers mon dict seigneur de Nevers comme cappitaine general. Dimanche premier jour de fevrier le roy ouyt messe a leglise cathedrale et vespres aux Augustins hors de la dicte ville de Belistre. Lundy deuxiesme jour du dict moys le roy ouyt au dict Belistre la grant messe a la grant eglise cathedrale le jour de la Chandeleur acompaigne de quatre cardinaulx et six evesques et fit le service monseigneur dAngiers confesseur du roy. Mardy troisiesme jour du dict moys le roy partit du dict Belistre apres la messe ouye et le disner et sen alla coucher a Valemonton. Mercredy ive jour de fevrier le roy apres la messe ouye partit du dict Valemonton et alla disner a la Tour et coucher a Florentine. Jeudy v jour de fevrier le roy ouyt messe a Florentine et la fit baptiser un juif qui de son bon gre luy requist estre baptise et le tint le roy dessus les fons et eut nom Charles, et le baptisa levesque dAngiers confesseur du roy en la presence de plusieurs grans gens deglise comme cardinaulx archevesques, evesques et chanoines, comme maistre Pierre Gaultier chanoine de lAn, de Tournay et cler doffice du roy, et commis au controle de la despence du roy. En icelle ville au dessus a une abbaye ou est le corps de sainct Ambroise et y a moult beau lieu et plaisant. Le vendredy v jour de fevrier le roy ouyt la messe au dict lieu et alla disner et coucher a Verlic. CHAPITRE XIX. Comment le roy fist son entree a Verlic, et comment le mont Sainct Jehan fut prins vaillamment. AMEDY VIIe jour de fevrier le roy ouyt messe a Verlic au lieu ou est le corps de saincte Marie Jacobee. Et vindrent au devant du roy les seigneurs de leglise, les nobles et autres et le convoyerent jusques a son logis a tout clochettes, luminaires torches et cierges, car ils apporterent le corps de saincte Marie Jacobee seur de la Vierge Marie devant le roy pour venir a leglise qui estoit belle chose a veoir. Dimanche vIII" jour de fevrier le roy ouyt la messe au dict lieu, y disna, souppa et coucha. Lundy Ix jour du dict moys le roy apres la messe alla disner a Bahut une belle place et forte, et apres disner partit du dict Bahut et alla veoir le siege devant le mont Sainct Jehan une terrible place, se leur sembloit ville et chasteau et bien garnie de vivres et dautres choses necessaires a la guerre, et y avoit des gens de plusieurs nations. La ville fut fort battue dartillerie bas et hault et de tous costes. Ceste ville est en ung pendant moult forte et le chasteau plus hault, et fut lassault du plus fort coste, et fut si oppressec dassault que le siege ne dura que huyt heures et lassault demye heure combien quils se myrent en grant deffence de ruer pierres des tours et des murailles et fut prinse par une breche dune tour rompue ou avoit quelque apparance de sang. Par celle breche entra ung jeune homme hardy vestu dung hoqueton rouge servant a la dicte artillerie. Cestuy compaignon estoit natif de Bourgongne pres de Montbart et fut le premier qui y entra. Le roy estoit present a cest assault et la plus grande partie des seigneurs de son armee, et fut lassault le plus chault et le plus vert que veit pieca. Et ne furent que trente Francois tues tant hommes darmes que archiers dordonnance, mais de ceulx de lartillerie y en eut beaucoup de blesses, et de ceulx de dedans y en eut de mors par compte fait sept cens et six, et cut la charge de les faire ensevelir et enterrer monseigneur dAngiers et le maistre dhostel de Borosse et monseigneur de Taillebourg pour garder les lon |
